因為選舉緣故有人來創治線頂地圖，共𪜶想欲罵的候選人的問題別莊、舊厝抑是土地畫到地圖頂懸，線頂地圖攏受著影響，其中這改竟然有人想著OpenStreetMap矣。

In-ūi soán-kí iân-kò͘ ū-lâng lâi chhòng-tī sòaⁿ-téng tōe-tô͘, kā in siūⁿ-boeh mē ê hāu-soán-lâng ê būn-tê pia̍t-chong, kū-chhù ia̍h-sī thô͘-tōe ōe kàu tōe-tô͘ téng-koân, sòaⁿ-téng tōe-tô͘ lóng siū-tio̍h éng-hióng, kî-tiong chit-kái kèng-jiân ū-lâng siūⁿ-tio̍h OpenStreetMap–ah

頭起先來講逐家攏知，全臺迵知的Google地圖。Google地圖予人創甲留無全屍，基本上是一陣人去大量改，真簡單予人改好顯示到地圖頂懸，你會當看著各種歹聽的名號出現矣。賴清德、馬文君、謝衣鳳、柯文哲的爭議所在予人標示。

Thâu-khí-sian ta̍k-ke lóng-chai, choân-tâi thàng-chai ê Google tōe-tô͘. Google tōe-tô͘ hō͘-lâng chhòng kah lâu-bô choân-si, ki-pún-siōng sī chi̍t-tīn-lâng khì tōa-liōng kái, chin kan-tan hō͘-lâng kái=hó hián-sī kàu tōe-tô͘ téng-koân, lí ē-tàng khòaⁿ-tio̍h kok-chióng pháiⁿ-thiaⁿ ê miâ-hō chhut-hiān–ah. Lōa Chheng-tek, Má Bûn-kun, Chiā I-hōng, Koa Bûn-tiat ê cheng-gī só͘-chai hō͘-lâng piau-sī.

OpenStreetMap欲申請口座是真簡單，凊彩畫加添假的資料嘛是會用得，毋過有社群佇咧守護地圖的資料，真緊予恢復轉來矣。社群有討論欲按怎來編輯，凡勢有照on the ground原則編輯就會使矣。台灣的社群OpenStreetMap Taiwan teh 守護圖資，莫予人烏白來是做甲足讚的！

OpenStreetMap boeh sin-chhéng kháu-chō sī chin kan-tan, chhìn-chhái ōe sīm-chì ka-thiam ké–ê chu-liāu mā-sī ē-ēng-tit, m̄-koh ū siā-kûn tī-teh siú-hō͘ tōe-tô͘ ê chu-liāu, chin-kín hō͘ hoe-ho̍k tńg–lâi–ah. Siā-kûn ū thó-lūn boeh án-chóaⁿ lâi pian-chip, hoān-sè ū-chiàu on the ground goân-chek pian-chip tō ē-sái–ah. Tâi-oân ê siā-kûn OpenStreetMap Taiwan chiok-chàn–ê!

聽講中文維基百科嘛有人想欲寫賴清德祖厝戲弄的名號賴皮寮，欲創條目予人擋掉，嘛有想等自動確認用戶的身份提著了後繼續，真正害，毋知袂當按呢做的原因。

Thiaⁿ-kóng Tiong-bûn Ûi-ki Pah-kho mā-ū-lâng siūⁿ-boeh siá Lōa Chheng-tek chó͘-chhù hí-láng ê miâ-hō Lōa-phôe-liâu, boeh chhòng tiâu-bo̍k hō͘-lâng tóng–tiāu, mā ū siūⁿ tán chū-tōng khak-jīn iōng-hō͘ ê sin-hūn the̍h-tio̍h liáu-āu kè-siok, chin-chiàⁿ hāi, m̄-chai bōe-tàng án-ni chòe ê goan-in.

選舉相關爭議佮地圖編輯整理列表，落尾佇論壇發文：

Soán-kí siong-koan cheng-gī kah tōe-tô͘ pian-chip chéng-lí lia̍t-pió, lo̍h-bé tī lūn-tôaⁿ hoat-bûn:

• 黃國昌汐止停車場(25.05489,121.65689)：有note有繪製
• 賴清德萬里礦區舊厝(25.17086,121.67610)：有note有建築繪製、有戲弄的興趣點（予人移除矣）
• 馬文君埔里別莊(23.9717100, 120.9544100)：有note猶未繪製
• 謝衣鳳溪洲別莊(23.8531417, 120.4923108)：有note有繪製

• 柯文哲新竹農地遊覽車停車場(24.8034000, 121.0058000)：有note猶未繪製

• N̂g Kok-chhiong Se̍k-chí thêng-chhia-tiûⁿ (25.05489,121.65689): ū note ū hōe-chè
• Lōa Chheng-tek Bān-lí khòng-khu kū-chhù (25.17086,121.67610): ū note ū kiàn-tiok hōe-chè, ū hí-láng ê hèng-chhù-tiám (hō͘-lâng î-tû–ah)
• Ma Bûn-kun Po͘-lí pia̍t-chong (23.9717100, 120.9544100): ū note iah-bē hōe-chè
• Chiā I-hōng Khe-chiu pia̍t-chong (23.8531417, 120.4923108): ū note ū hōe-chè
• Koa Bûn-tiat Sin-tek lông-tōe iû-lám-chhia thêng-chhia-tiûⁿ (24.8034000, 121.0058000): ū note iah-bē hōe-chè

對地圖編輯的狀況來看，針對賴清德的攻擊較惡意，嘛創無存在的興趣點。其他攏是看著新聞去標示違規抑是爭議的利用的所在。

Tùi tōe-tô͘ ê chōng-hóng lâi khòaⁿ, chiam-tùi Lōa Chheng-tek ê kong-kek khah ok-ì, mā chhòng bô chûn-chāi ê hèng-chhù-tiám. Kî-thaⁿ lóng-sī khòaⁿ-tio̍h sin-bûn khì piau-sī ûi-kui ia̍h-sī cheng-gī ê lī-iōng ê só͘-chai.

其實，臺灣遮真濟所在的土地利用佇OpenStreetMap頂懸猶未畫，嘛毋免講較細膩的住宅區、庄頭聚落，內底的建築嘛是猶未畫。一般來講，OpenStreetMap是欲對較闊的物件開始畫，親像講整體的土地利用，森林、住宅區，大條的街仔路、社區重要的設施，閣來才是一棟一棟的樓仔厝，商家，落尾有才調才是來處理地址的部份。

Kî-si̍t, Tâi-oân chia chin-chōe só͘-chai ê thô͘-tōe lī-iōng tī OpenStreetMap téng-koân iah-bē ōe, mā m̄-bián kóng khah sòe-lī ê chū-the̍h-khu, chng-thâu chū-lo̍h, lāi-tóe ê kiàn-tiok mā-sī iah-bē ōe. It-poaⁿ lâi kóng, OpenStreetMap sī boeh tùi khah-khoah ê mn̍gh-kiāⁿ khai-sí ōe chhin-chhiūⁿ kóng chéng-thé ê thô͘-tōe lī-iōng, sim-lîm, chū-the̍h-khu, tōa-tiâu ê koe-á-lō͘, siā-khu tiōng-iàu ê siat-si, koh-lâi chiah-sī chi̍t-tòng-chi̍t-tòng ê lâu-á-chhù, siong-ka, lo̍h-bé ū-châi-tiāu chiah-sī lâi chhú-lí tōe-chí ê pō͘-hūn.

萬里區中幅仔賴清德舊厝附近有一寡無正常的編輯，新北市政府無釋出地址的開放資料，除非有人去當地實地看覓，應該是無法度合OpenStreetMap袂使抄別的地圖的資料的規則，加添建築遐的地址有憢疑，照上嚴格的歐洲人的標準，為著莫有資料庫權利佮授權汙染的問題，上好愛共看別的地圖加添的資料移除予清氣。

Bān-lí-khu Tiong-hok-á Lōa Chheng-tek kū-chhù hù-kūn ū-chi̍t-kóa bô chèng-siông ê pian-chip, Sin-pak-chhī-chèng-hú bô sek-chhut tōe-chí ê khai-hòng chu-liāu, tû-hui ū-lâng khì tong-tōe si̍t-tōe khòaⁿ-māi, eng-kai sī bô-hoat-tō͘ ha̍p OpenStreetMap bōe-sái chhiau pat-ê tōe-tô͘ ê chu-liāu ê kui-chek, ka-thiam kiàn-tiok hia-ê tōe-chí ū-giâu-gî, chiàu siōng giâm-keh ê Au-chiu-lâng ê piau-chún, ūi-tio̍h mài ū chu-liāu-khò͘ khoân-lī kah siū-koân u-jiám ê būn-tê, siōng-hó ài kā khòaⁿ pa̍t–ê tōe-tô͘ ka-thiam ê chu-liāu î-tû hō͘ chheng-khì

趁這个逐家關心土地利用是毋是合法的時陣，有逐家濟濟參與的OpenStreetMap土地利用、建築畫較濟，咱社會會當有基礎的資料會當來討論。萬里區倚近濱海公路，較鬧熱的所在攏無好好共畫甲完整，去一个廢棄礦區，嘛無啥居民蹛的所在畫，心態真無正確，毋是為著OpenStreetMap計畫的發展來貢獻，心內動機予人質疑。

Thàn chit-ê ta̍k-ke koàn-sì thô͘-tōe lī-iōng sī-m̄-sī ha̍p-hoat ê sî-chūn, ū ta̍k-ke chōe-chōe chham-ú ê OpenStreetMap thô͘-tōe lī-iōng, kiàn-tiok ōe khah chōe, lán siā-hōe ē-tàng ū ki-chhó͘ ê chu-liāu ē-tàng lâi thó-lūn. Bān-lí-khu óa-kūn pin-hái kong-lō͘, khah nāu-jia̍t ê só͘-chai lóng bô hó-hó kā ōe kah oân-chéng, khì chi̍t-ê hòe-khì khòng-khu, mā bô-siáⁿ ku-bîn tòa ê só͘-chai ōe, sim-thài chin bô chèng-khak, m̄-sī ūi-tio̍h OpenStreetMap kè-ōe ê hoat-tián lâi kòng-hiàn, sim-lāi tōng-ki hō͘-lâng chit-gî.