本文章同時嘛有提供 English version 佮華語版本

開放街圖臺灣社群（OpenStreetMap 臺灣社群）誠歡喜爭取到維基媒體基金會的聯盟補助，主要欲買兩台 Insta360 One X2 翕相機（佮相關的配件），猶閣有規劃對2022年3月開始，一直到2023年2月的街景踏查團佮對應的編輯工作坊活動。咱欲辦理六擺實地踏查佮至少六擺的編輯工作坊。社群成員欲共360翕相機囥佇汽車車頂，若開車若翕360相片，翕猶未翕著街景的所在。翕了後佇咧電腦前，閣來若看翕的相片，若編輯 OpenStreetMap 共編地圖添加資料，猶有共路途中間經過的景緻佮在庄聚落，共相關相片上傳到 Wiki Commons 多媒體站。

Khai-hóng Kue-tôo Tâi-uân Siā-kûn（OpenStreetMap Tâi-uân Siā-kûn）tsiânn huann-hí tsing-tshú kàu Uî-ki Muî-thé Ki-kim-huē ê Liân-bîng Póo-tsōo, tsú-iàu bueh bué nn̄g-tâi Insta360 One X2 hip-siòng-ki (Kah siong-kuan ê phuè-kiānn), iáu-koh-ū kui-uē tuì 2022-nî 3–ge̍h khai-sí, it-ti̍t kàu 2023-nî 2–ge̍h ê kue-kíng tah-tshâ-thuân kah tuì-ìng ê pian-tsi̍p kang-tsok-hong ua̍h-tōng. Lán-bueh pān-lí la̍k-pái si̍t-tuē tah-tsâ kah tsì-tsió la̍k-pái ê pian-tsi̍p kang-tsok-hong. Siā-kûn sîng-uân bueh kā 360 hip-siòng-ki khǹg tī khì-tshia tshia-tíng, nā khui-tshia nā hip 360 siòng-phìnn, hip iah-bē hip-tio̍h kue-kíng ê sóo-tsāi. hip liáu-āu tī tiān-náu tsîng, koh-lâi nā khuànn hip–ê siòng-phìnn, nā pian-tsi̍p OpenStreetMa kiōng pian tuē-tôo thiam-ka tsu-liāu, iáu-ū kā lōo-tôo tiong-kan king-kè ê kíng-tì kap tsāi-tsng tsu-lo̍h, kā siong-kuan siòng-phìnn siōng-thuân kàu Wiki Commons to-muî-thé-tsām.

這擺踏查團和頂擺行無仝的方向，頂擺是對北海岸（主要是基隆、金山、萬里）的方向行，毋過這擺是對鶯歌、三峽、大溪的方向翕相，和頂擺無仝，這擺是三台車的出發地點攏無仝（筆者駕駛的車是對和運租車新店站出發的，佇出發進前嘛發見路對面的新店區公所站二號出口猶未翕過，所以就順手翕一張囥佇 Wikimedia Commons頂懸）。

Tsit-pái tah-tsha-thuân hām tíng-pái kiânn bô-kâng ê hong-hiòng, tíng-pái sī tuì Pak-hái-huānn (tsú-iàu sī Ke-lâng, Kim-san, Bān-lí) ê hong-hiòng kiânn, m̄-koh tsit-pái sī tuì Ing-ko,Sam-kiap, Tāi-khe ê hong-hiòng hip-siòng, hām tíng-pái bô-kâng, tsit-pái sī sann-tâi-tshia ê tshut-huat tuē-tiám lóng bô-kâng (pit-tsiá ká-sú ê tshia sī tuì Hô-ūn Tsoo-tshia Sin-tiàm-tsām tshut-huat ê, tī tshut-huat tsìn-tsîng mā huat-kìnn lōo tuì-bīn ê Sin-tiàm Khu-kong-sóo tsām 2-hō tshut-kháu iah-bē hi̍p–kè, sóo-í tō sūn-tshiú hip tsi̍t-tiunn khǹg tī Wikimedia Commons 頂懸）.

行車的路線嘛攏無仝（毋過中間抑是有設立會合點，是佇三峽白雞山的行脩宮）。

Kiânn-tshia ê lōo-suànn mā lóng bô-kâng (m̄-koh tiong-kan ia̍h-sī ū siat-li̍p huē-ha̍p-tiám, sī tī Sam-kiap Pe̍h-kue-suann ê Hîng-siu-kiong）.

毋過親像頂擺的街景踏查團仝款，這改出門抑是發見一寡執行上的小可仔問題，親像是360相機看起來是愛直接鎖佇車用吸盤上，袂使閣加自翕棒架懸，猶若會因為自翕棒重量的關係予相機斜倒，相片翕的角度無正確，猶閣有就是……出發進前愛會記得共記憶卡內的物件攏總紲出來，抑若無路途中間愛停落來刣相片XD。

M̄-koh tshin-tshiūnn tíng-pái ê kue-kíng tah-tshâ-thuân kâng-khuán, tsit-kái tshut-mn̂g ia̍h-sī huat-kiàn tsi̍t-kuá tsip-hîng-siōng ê sió-khuá-á būn-tê, tshin-tshiūnn sī 360 siòng-ki khuànn-khí-lâi sī ài ti̍t-tsiap só tī tshia-iōng khip-puânn siōng, buē-sái koh-ka tsū-hip-pāng kè-kuân, iah-nā-ē in-uī tsū-hip-pāng tāng-liōng ê kuan-hē hōo siòng-ki tshiâ-tó, siòng-phìnn hip-ê kak-tōo bô-tsìng-khak, iáu-koh-ū tō-sī……tshut-huat tsìn-tsîng ài-ē-kì-tit kā kì-i-khah lâi ê mn̍gh-kiānn lóng-tsóng suà-tshut-lâi, iah-nā-bô lōo-tôo tiong-kan ài thîng-lo̍h-lâi thâi siòng-phìnn XD.

這擺街景踏查團佇維基媒體計畫的追蹤用 Dashboard，OpenStreetMap 編輯會當佇遮看會著。

Tsi̍t-pái Kue-kíng Ta̍h-tshâ-thuân tī Uî-ki Muî-thé Kè-uē ê tui-tsong iōng Dashboard, OpenStreetMap pian-tsi̍p ē-tàng tī tsia khuànn-ē-tio̍h.

有關聯盟補助的代誌

2021年第四季時，維基媒體基金會公佈新的補助方案：維基媒體聯盟補助，這項補助會資助佮維基媒體計畫有關的專案，毋過並毋是各地的維基媒體自治體提出的提案。

iú-kuan liân-bîng póo-tsōo ê tāi-tsì

2021-nî tē-4-kuì sî,Uî-ki Muî-thé Ki-kim-huē kong-pòo sin-ê póo-tsōo hong-àn: Uî-ki Muî-thé Liân-bîng póo-tsōo, tsit-hāng póo-tsōo ē tsàn-tsōo kah Uî-ki Muî-thé kè-uē iú-kuan ê tsuan-àn, m̄-koh pīng m̄-sī kok-tuē ê Uî-ki Muî-thé tsū-tī-thé the̍h-tshut ê thê-àn.

有關 OpenStreetMap 臺灣的代誌

OpenStreetMap 臺灣由臺灣關心投入 OpenStreetMap 的編輯者構成，自 2010 年開始對個人獨編輯變成集合閣較濟人參與的共編地圖專案的在地社群。目前佇臺灣有佇台北佮 Wikidata 社群共同舉行 OpenStreetMap x Wikidata 月聚，嘛有不定期的踏查活動。

iú-kuan OpenStreetMap Tâi-uân ê tāi-tsì

OpenStreetMap Tâi-uân iû Tâi-uân kuan-sim tâu-ji̍p OpenStreetMap ê pian-tsi̍p-tsiá kòo-sîng, tsū 2010-nî khai-sí tuì kò-jîn to̍k pian-tsi̍p piàn-sîng tsi̍p-ha̍p koh-khah tsuē lâng tsham-ú ê kiōng-pian tuē-tôo tsuan-àn ê tsāi-tuē siā-kûn. Bo̍k-tsîng tī Tâi-uân ū tī Tâi-pak kah Wikidata siā-kûn kiōng-tông kú-hîng OpenStreetMap x Wikidata ge̍h-tsū, mā-ū put-tīng-kî ê tah-tshâ ua̍h-tōng.

本文感謝 Supaplex 協助校對並翻譯台文版本，英文版是 assanges 翻譯，全部文章用姓名標示-相同方式分享 4.0 國際授權。

Pún-bûn kám-siā Supaplex hia̍p-tsōo kàu-tuì pīng huan-i̍k Tâi-bûn pán-pún, Ing-bûn pán sī assanges huan-i̍k, tsuân-pōo bûn-tsiong iōng sìng-bîng piáu-sī-kâng-khuán hong-sik hun-hióng 4.0 kok-tsè siū-khuân.