OpenStreetMap
▲ 第二擺的工作坊的相片
本文嘛有 Taiwanese Mandarin (台灣華語) 佮 英文 / English 版本
著，你無看毋著，頂擺是第一擺的街景踏查團，毋過這擺是第二擺的編輯工作坊，你敢好玄為何毋是第一擺的編輯工作坊，這……講起來話頭長，莫佇遮寫好啦XD，看頂擺的日記猶是有法度看會出來，抑是佇聚會時來共咱開講。
Tio̍h, lí bô khuànn-m̄-tio̍h, tíng-pái sī Tē-it-pái ê kue-kíng tah-tsâ-thuân, m̄-koh tsit-pái sī tē-jī-pái ê pian-tsi̍p kang-tsok-hong, lí kám hònn-hiân uī-hô m̄-sī tē-it-pái ê pian-tsi̍p kang-tsok-hong, tse……kóng-khí-lâi uē-thâu-tn̂g, mài tī tsia siá hó–lah XD, khuànn tíng-pái ê ji̍t-kì 猶是 ū-huat-tōo khuànn-ē–tshut-lâi, ia̍h-sī tī tsū-huē sī lâi kā lán khai-káng.
是講，自頂擺的街景踏查團 ~~（公費旅行團）~~ 了後，開放街圖臺灣社群（OpenStreetMap 臺灣社群）佇2022年5月22號佇摩茲工寮舉辦用來編輯街景踏查團收集到資料的工作坊。毋過台灣疫情因素，予實體活動的參與人數變真少，嘛仝步影響這擺第二擺工作坊出席人數。毋過猶是有兩位地理老師來到現場。
▲ 熱情的地理老師來參加活動!
sī-kóng, tsū tíng-pái ê kue-kíng tah-tsâ-thuân ~~(kong-huì lú-hîng-thuân)~~ liáu-āu, Khai-hóng kue-tôo Tâi-uân siā-kûn（OpenStreetMap Taiwan) tī 2022-nî 5-ge̍h 22-hō tī Moz kang-liâu kú-pān iōng-lâi pian-tsi̍p kue-kíng tah-tsâ-thuân siu-tsi̍p kàu tsu-liāu ê kang-tsok-hong. M̄-koh Tâi-uân i̍k-tsîng in-sòo, hōo si̍t-thé ua̍h-tōng ê tsham-ú jîn-sòo piàn tsin-tsio, mā kâng-pōo íng-hióng tsit-pái tē-jī-pái kang-tsok-hong tshut-si̍k jîn-sòo. M̄-koh iáu-sī ū nn̄g-uī tuē-lí lāu-su lâi-kàu hiān-tiûnn.
頭起先紹介 OpenStreetMap 佮 Wikidata（仝場加映 Mapillary 佮 KartaView 等等其他維基媒體專案的紹介），閣來主持人之一的 Supaplex 現場示範利用踏查團翕的 Mapillary 360 影像佇 OpenStreetMap 繪製佇新店央北重劃區內的超商門市，閣有對 Mapillary 下載相片並且上傳到維基共享資源，閣來佇 Wikidata 上新增新北市青年社會住宅的新項目。
▲ 國家人權博物館的 360 相片
Thâu-khí-sing siāu-kài OpenStreetMap kah Wikidata （kâng-tiûnn ka-ìng Mapillary kah KartaView tíng-tíng kî-thá Uî-ki muî-thé tsuan-àn ê siāu-kài), koh-lâi tsú-tshî-jîn tsi-it ê Supaplex hiān-tiûnn sī-huān lī-iōng tah-tsâ-thuân hip ê Mapillary 360 iánn-siōng tī OpenStreetmap uē-tsè tī Sin-tiàm Iong-pak Tîng-uē-khu lāi ê tshiau-siong mn̂g-tshī, koh-u tuì Mapillary hā-tsài siòng-phìnn pīng-tshiánn siōng-thuân kàu Uî-ki Kiōng-hiáng Tsu-guân, koh-lâi tī Wikidata siōng sin-tsing Sin-pak-tshī Tshing-liân Siā-huē Tsū-the̍h ê sin-hāng-bo̍k.
紹介佮示範了後開放現場參與者自由編輯以上提到的網站內容，編輯過程當中嘛發現一寡共 360 相片相關的問題，比如講維基共享資源愛另外加添 {{pano360}} 模板才會當完整辨識 360 相機翕的相片，閣來 KartaView 佇上傳 360 照片時愛佇上傳指令加上一寡選項才會當其正常辨識。
咱期待要閣調整講解難度佮減少講解內容，偏向閣較實作型的教學，有問題閣再提出來。頭前講師簡單講完本次任務了後，多位資深編輯手把手協助新手完成工作事項。
咱嘛歡迎隨時線頂運用四月踏查成果，看街景圖佇咧電腦上添加看到的商家抑是住宅建案。台灣數一數二的重量級貢獻者 littlebtc 工作坊當天無法度來參加，伊是增加完成央北重劃區的建案，猶有後續央北二期的計畫道路繪製工課。
第一擺街景踏查團翕的相片，佮這擺編輯工作坊的相關成果會當佇後尾清單看著：
- OpenStreetMap
- 追蹤維基媒體專案用的 Dashboard
當然矣，工作坊當天的影像紀錄嘛袂少。此外，後擺的踏查團佇2022年6月19日舉辦，歡迎大家鬥陣來參與！
有關聯盟補助的代誌
2021年第四季時，維基媒體基金會公佈新的補助方案：維基媒體聯盟補助，這項補助會資助佮維基媒體計畫有關的專案，毋過並毋是各地的維基媒體自治體提出的提案。
iú-kuan liân-bîng póo-tsōo ê tāi-tsì
2021-nî tē-4-kuì sî,Uî-ki Muî-thé Ki-kim-huē kong-pòo sin-ê póo-tsōo hong-àn: Uî-ki Muî-thé Liân-bîng póo-tsōo, tsit-hāng póo-tsōo ē tsàn-tsōo kah Uî-ki Muî-thé kè-uē iú-kuan ê tsuan-àn, m̄-koh pīng m̄-sī kok-tuē ê Uî-ki Muî-thé tsū-tī-thé the̍h-tshut ê thê-àn.
有關 OpenStreetMap 臺灣的代誌
OpenStreetMap 臺灣由臺灣關心投入 OpenStreetMap 的編輯者構成，自 2010 年開始對個人獨編輯變成集合閣較濟人參與的共編地圖專案的在地社群。目前佇臺灣有佇台北佮 Wikidata 社群共同舉行 OpenStreetMap x Wikidata 月聚，嘛有不定期的踏查活動。
iú-kuan OpenStreetMap Tâi-uân ê tāi-tsì
OpenStreetMap Tâi-uân iû Tâi-uân kuan-sim tâu-ji̍p OpenStreetMap ê pian-tsi̍p-tsiá kòo-sîng, tsū 2010-nî khai-sí tuì kò-jîn to̍k pian-tsi̍p piàn-sîng tsi̍p-ha̍p koh-khah tsuē lâng tsham-ú ê kiōng-pian tuē-tôo tsuan-àn ê tsāi-tuē siā-kûn. Bo̍k-tsîng tī Tâi-uân ū tī Tâi-pak kah Wikidata siā-kûn kiōng-tông kú-hîng OpenStreetMap x Wikidata ge̍h-tsū, mā-ū put-tīng-kî ê tah-tshâ ua̍h-tōng.
本文感謝 Supaplex 協助校對並翻譯台文版本，英文版是 assanges 翻譯，全部文章用姓名標示-相同方式分享 4.0 國際授權。
Pún-bûn kám-siā Supaplex hia̍p-tsōo kàu-tuì pīng huan-i̍k Tâi-bûn pán-pún, Ing-bûn pán sī assanges huan-i̍k, tsuân-pōo bûn-tsiong iōng sìng-bîng piáu-sī-kâng-khuán hong-sik hun-hióng 4.0 kok-tsè siū-khuân.
Discussion